بە ناوی خوای بەخشندەی میهرەبان

 

جێی سەرسوڕمان نییە کە سەلەفییەکان لەم سەردەمی شێواندنی ڕاستییەکاندا هێرشیان دەکرێتە سەر، چونکە ئەوان کەسانێکن ڕاهاتوون لەسەر ئەوەی شتەکان بە ناوی خۆیانەوە ناو بنێن، بەبێ دووڕوویی و چەواشەکاری. هەروەها بە نیوەی ڕاستییەکان ڕازی نابن و ئایینەکەیان لە بازاڕی ڕووکەشکاریدا نافڕۆشن.

 

١. لە بابەتى ناوبردنی دەسەڵاتداران:

 

سەلەفییەکان حاکمی وڵاتی موسڵمانان بە "وەلی ئەمر" ناو دەبەن، هەروەک چۆن شەرع ئاماژەی پێداوە، مادام خاوەن هێز و دەسەڵاتە و حوکمی موسڵمانان دەکات. بەڵام تەکفیرییە توندڕەوەکان ئەم ناو لێنانە بە خراپ دەزانن و دەڵێن: "چۆن کەسێکی کافر یان تاغوت بە وەلی ئەمر ناو دەبرێت؟!" وەک بڵێی حاکم تەنها کاتێک بە وەلی ئەمر ناودەبرێت کە وەک ئەبوبەکر و عومەر بێت! پاشان بە درۆ سەلەفییەکان تۆمەتبار دەکەن بەوەی کە ئەوان ئەم حاکمانەیان هەڵبژاردووە و دایناون، بێ ئاگا لەوەی کە سەلەفییەکان نە کەس دادەمەزرێنن و نە کەسیش دیاری دەکەن، بەڵکو تەنها وەسفی واقیع دەکەن بەپێی پێوەری شەرع.

 

٢. لە ئاگادارکردنەوە لە حیزبایەتی:

 

سەلەفییەکان پێیان وایە کە جیابوونەوە و حیزبایەتی لەنێوان موسڵماناندا دەردێکی کوشندەیە، ئوممەت لاواز دەکات و ڕیزەکان پەرت دەکات. بۆیە لێی ئاگاداریان کردۆتەوە، بەمەش حیزبییەکان تووڕە بوون و تۆمەتباریان کردن بەوەی کە لەگەڵ "کۆمەڵە ئیسلامییەکان"دا نین، وەک بڵێی لای ئەوان دڵسۆزی بۆ هەق نییە، بەڵکو بۆ ئاڵا و دروشمەکانە.

 

٣. لە ڕاستکردنەوەی عەقیدە:

 

سەلەفییەکان لە بابەتی یەکتاپەرستیدا ڕووکەشکاری ناکەن و هاوارکردن لە مردووان و کڕنوش بردن بۆیان بە پەرستنی غەیری خودا ناو دەبەن، هەروەک چۆن قورئان و سوننەت ناویان بردووە. بەهۆی ئەمەوە گۆڕپەرستان تووڕە بوون و تۆمەتباریان کردن بە دوژمنایەتی کردنی پیاوچاکان، لە کاتێکدا نەشیانزانیوە کە گەورەترین دڵسۆزی بۆ پیاوچاکان بریتییە لە بەرگریکردن لەو یەکتاپەرستییەی کە ئەوان هێناویانە.

 

٤. لە بەرەنگاربوونەوەی بیدعە:

 

هەر شتێک لە ئاییندا دابهێنرێت و خودا ڕێگەی پێنەدابێت، سەلەفییەکان بە بیدعەی ناو دەبەن، لەبەر فەرموودەی پێغەمبەر (ﷺ): «هەموو داهێنراوێک بیدعەیە». بەهۆی ئەمەوە داهێنەران (مبتدعة) تووڕە بوون و بە توندڕەو یان دواکەوتوو ناویان بردن، چونکە بێزار بوون لەو کەسانەی کە خەڵکی لە خەوی شوێنکەوتنی کوێرانە بەئاگا دەهێنن.

 

٥. لە هەڵوێستیان بەرامبەر "دەستوەردان لە دوژمنان":

 

سەلەفییەکان جیاوازی دەکەن لەنێوان جیهادی شەرعی و دەستدرێژی بێ بیرکردنەوە کە دەبێتە هۆی لەناوچوون. ئەوان وروژاندنی ئاژاوە لەگەڵ دوژمنی بەهێزدا بە گەندەڵی ناو دەبەن نەک جیهاد، هەروەک لە چەندین شوێندا ڕوویداوە کە کارەسات و وێرانی بەسەر ئوممەتدا هێناوە. بەمەش کەسانی پەرۆش تووڕە بوون و سەلەفییەکانیان تۆمەتبار کرد بەوەی دژی جیهادن و لەگەڵ کافرانن!

 

٦. لە وەسفکردنی واقیعدا:

 

کاتێک سەلەفییەکان لە واقیعی خەڵکی ستەملێکراوی غەززەدا زیان و وێرانییەکی زیاتر دەبینن لە سەرکەوتن و ظەفەر، بە ڕاستگۆیی و دڵسۆزییەوە باسی دەکەن، نەک لەبەر خۆشی دەربڕین بە بەڵای ئەوان، بەڵکو لەبەر بەزەیی و ڕوون کردنەوەیە. بەمەش کەسانی پەرۆش تووڕە دەبن و ئەمە بە ساردکردنەوە لە جیهاد دەبینن، چونکە نایانەوێت کەسێک باسی باجی قورسی بڕیارە پەلەپەلەکانیان بکات.

 

بەم شێوەیە سەلەفییەت بووە و هەر واش دەمێنێتەوە: دەمامکی ڕووکەشکاری لەسەر حسابی عەقیدە لەسەر ناکات، و زاراوەکان ناگۆڕێت بۆ ڕازیکردنی جەماوەر، و لەبەر خودا لە لۆمەی لۆمەکاران ناترسێت.

خوای گەورەش دەفەرموێت: ﴿وَقُولُوا لِلنَّاسِ حُسْنًا﴾ واتە: "قسەی چاک لەگەڵ خەڵکیدا بکەن"، نەیفەرمووە: "قسەیەک بکەن کە ڕازییان بکات!".

د.عبداللطيف أحمد الأمين

٣/سەفەر/١٤٤٧ک